Legenda "Simbolon Tuan"

Tugu Simbolon

Ia Simbolon Tuan margoar do huhut Tuan Nahodaraja, digoar do pinomparna "SIMBOLON TUAN NAHODARAJA". Maringanan do Ompui di Pangururan (P.Samosir) di bona ni dolok Pusuk Buhit, dipinggir ni Tao Toba nauli i.

Di nasahali laho ma TUAN NAHODARAJA tu Dolok Pusukbuhit mangultop Anduhur Bombom, jadi hona ma diultop, alai ndang mate. Jadi sai mangambur-ambur ma Anduhur i dipaihut-ihut ro di punsu ni Dolok Pusuk buhit i, laos so jumpangsa do. Alai ro ma sahalak boru natuatua, na maringanan di Tombak i mandok tu ibana : Halak dia do ho ale amang! "Iale inang, halak pangultop do ahu. Na paihutihut Anduhur Bombom, hurimpu dapot, hape sai laho do mangambur. Jadi nunga bot ari, ndang huboto be dalan mulak tu hutanami!".

Molo songon i amang, tu bagashu ma hamu sorang, Marsogot pe hamu mangultop ai tung na laplap do dison Anduhur bombom. Denggan mai inang, mauliate ma dihamu ninna Tuan Nahodaraja. Marsogotna i, mangultop ma ibana tu punsu ni Dolok Pusuk Buhit di topi ni lintong simajoajo. Hape tompu ma ro pitu anak boru, boru ni Bataraguru angka na marhabongkabongkon baju-bajuna be, laho martajung tu lintong simajoajo i. Jadi tarsonggot ma Tuan Nahodaraja marnida hasangaponnasida dohot hinaulina. Alai sai sumurung do hinauli nisada sian anakboru i namargoar si LEANGNAGURATTA diida, gabe naeng ma buatonna i bahen niolina. Jadi angkal ma dibahen mambuat, ditanom ma olat ni rungkungna tu toru, unang haidaan ibana. Di namarhatobung i nasida namaridi i, marende ma nasida, huhut mandok : "Hutuktuk ma pangirhu dompak mataniari, ro ma anak ni namboru, asa hulehon mardaonbari!" huhut mengkelengkel be. Hape nunga diluahon Tuan Nahodaraja baju Habonghabong ni si Leangnaguratta. Ia dung ro be tu duru angka na martanjung i, masi pabongot habongna be ma, hape ndang disi be habong ni si Leangnaguratta, jadi pintor tangis ma ibana.

Dung i dipaihut ihut ma bogas nipat, jadi diida ma Tuan Nahodaraja mangaluahon bajubajuna i. Dung didok ma : "E, amang pardalan paima ahu disi, paulak bajubajungki nunga laho donganku! Ida ma, soadong parabitonku!" Jadi manaili ma Tuan Nahodaraja dompak pudi, hape gabe tungko-tungko ma ibana. Tes ninna Leangnaguratta, manigor dibuat ma bajubajuna i, habang ma ibana tu banua ginjang.

Dung leleng Tuan Nahodaraja ndang mulak, laho ma boruboru soranganna i margoar NAN SANDUOR maningkir tu balian huta, diida ma tutu Tuan Nahodaraja i nunga gabe tungko- tungko, gabe mangandung ma Nan Sanduor songon on: Beha ma parpusukmu rantiti, beha ma pardangkam singgolom! beha ma partubungku sumangot, silaon na bolon! Ai nunga sada imbulu tubu, dua imbulu nangkok, tung manang ise pe nampuna tubu, nunga ahu nampuna ianakkon!"

Dung i laho ma Nan Sanduor mamboan pagar, dilipathon ma lili tunggal pitu hali tu tungkotungko i gabe mulak jolma ma Tuan Nahodaraja jadi rap muli ma nasida tu Huta. Tangis ma Tuan Nahodaraja mangalualuhon huhut mandok: "Bulung ni antarasa solot tu bulung bira, naung jolma ahu, gabe tungkotungko tarida, aut sipanganon nian botoon daina". Dungi ninna Nan Sanduor ma : "Ba unang ho sai tangis, ai pitu borngin nari, ro do angka boru ni Dewata i martanjung tu lintong i. Dung i onggop ma bajubajuna i, alai molo dijou nasida ho, unang manaili ho tu pudi. Pandabuhon ma dorma sipanogu-nogu on asa diihuthon ho ro di huta on!"

Dung jumpang papitu bornginhon, ro ma boru ni Dewata marembasembas, maridi tu lintong na di punsu ni dolok Pusuk buhit i, huhut marende songon on: "Panginsir ni sigumang pangalegot ni porapora, hapiling ni sidedeng boru ni namora, inanta boru tuan laen bolon, na pande marroha, nirohaanna i gabe jala mamora, jolma manisia i jut rohana huroha!".

Dung i monjap ma Tuan Nahodaraja mamereng partanjungon nasida i, jadi diida ma i songon sansan, songon sindor, songon hotang sambola talitalina, rait sugana ndang anina. Dua sarambar boni sinondang ni bohina, songon pusuk ni joring labe ni hulingkulingna. Dung i diluahon ma bajubajuna i.

Alai pintor didok si Leangnaguratta ma tu donganna na marbajui: "Ah, songon na marlobuk taroktokhu, dohot sampak mudarhu, aha ma namasa tu ahu ulaning ? ninna. Dung i laho be ma nasida tu duru, hape ndang disi be bajubaju ni si Leangnaguratta. Jadi pintor habang be ma donganna i tu banua ginjang, tinggal ma Leangnaguratta huhut mangandung, mangihuthon bogas ni halak Tuan Nahodaraja, jala manjoujou. Alai ndang manaili be Tuan Nahodaraja dompak pudi ai nunga jora ibana sai ditulus ma dalannna ro di huta.

Dung ro di huta Tuan Nahodaraja pintor diguluhon ma tu dagingna birong-birong jala marbulusan ma ibana modom-modom huhut marlongos longos hosana dipaula. Ndang piga dan nari, ro ma tu huta si Leangnaguratta disungkun ma boru Nan Sanduor : Ale Inang, dompak dia do baoa na mangaluahon bajungku nangkin diida hamu ?. Ndang adong dongan sahutangku dison ale eda, ai so holan anak sada baipe marsahit do nuaeng di jabu. Alai talului pe annon sai nadapot doi molo di huta on. Hundul majolo edangku marnapuran ma hita.

Ah ale inang ndang ro di napuran ahu nunga laho sude donganku tu dia nama ahu ?. Molo songon i diori edangku ma tu jabu. Dung i dibereng ma baoa na modommodom i huhut morong-orong dibege, jala marbirong rupana, marpalit dohot parsontinganna, jadi mulak ma ibana tu toru huhut mandok : Ndang disi, tu dia nama ahu ale Inang?

Ba dison hita ai so manang adong baoa di huta on rap ma hita paima dapot bajubaju mi! Tongon tahe, ninna roha ni Leangnaguratta. Jadi disuru Nan Sanduor ma ibana mangombus api asa mangaloppa. Hape dina mangombus api i ibana, nunga songon poso-poso Tuan Nahodaraja diida. dung i diombus ma api i hape diombus Tuan Nahodaraja ma sian bariba ni tataring, gabe sap sirabun ma sitabolan ni si Leangnaguratta, laos mangalualu ma ibana tu Nan Sanduor ninna ma : "Najungkat do anak mi Inang!" Olo tutu, jungkat doi sipata molo naeng manghatai, nanaeng manghatai do i huroha dohot ho!. Jadi rap mangalompa ma nasida na dua nalaho panganon ni nasida, Jadi dipapodompodom Tuan Nahodaraja ma dirina huhut mamerengmereng hinauli ni si Leangnaguratta.

Dung pitu ari si Leangnaguratta disi didok Nan Sanduor ma: Ua tung anakki ma pagodanggodang dainang! "Ah, tagonan ma ahu nongnong tu laut an, anggo tung tusi do dohononmu ninnna. Dung sabulan didok Leangnaguratta ma tu Nan Sanduor: Ale inang ise do baoa na modommodom di jabu i? Ai dakdanak do nian namburaon, alai nuaeng nunga magodang!. Olo inang, ninna Nan Sanduor najungkat do anakki, tongkin balga, tongkin nari metmet. Bo! Boi do hape ibana songon i? Alai nunga tung lomo roha ni Leangnaguratta mamereng Tuan Nahodaraja, Jadi saut ma ibana gabe dongan saripena.

Dung dilaonlaon ni ari, tubu ma sada anakna dohot sada boruna namuli tu marga MALAU. Dung i margondang ma nasida, mangkalashon anakkon nai, jadi longang ma halak marnida hamaloon ni Leangnaguratta manortor.

Dung i didok marga Sitanggang, Nadeak dohot Sigalingging ma: "Ua tung dipangke inanta ma jolo bajubajuna i manortor asa tung tarida hamaloonna dohot hamulionna. Dung i diapoi Tuan Nahodaraja ma niolina i mamangke, alai sai manjua do. Alai sai diapoi Tuan Nahodaraja do gabe diumma Leangnaguratta ma Tuan Nahodaraja dohot anakkonna na dua i huhut mandok : Sai hujua do mamangke bajui ba sai didatdati hamu mangapoi ahu, Ba ia hutadingkon hamuna unang ma hansit rohamuna.

Olo da ninna Tuan Nahodaraja huhut didok rohana dibagasan : Sian dia dalanna laho, nunga tinutup dohot amahamak tarup, tinutup do dohot pintu dohot sude lubang-lubang.

Dung i dipabongot Leangnaguratta ma antong bajuna i jadi manortor ma ibana. Ia tusi meleng Leangnaguratta tusi ma meleng pamereng ni angka painondur i saluhutna. Hape patolu gondangkon pintor habang ma Leangnaguratta ditolpushon ma tarup i marimong. Jadi ngangang ma mata ni Tuan Nahodaraja manuluthon niolina i dompak ginjang songon na hotostosan hail huhut mangandungi. Dung ro di langit Leangnaguratta didok amana Bataraguru ma : Sian dia do ho ale Leangnaguratta, nunga pola songoni leleng? dialusi si Leangnaguratta ma :"Sian paradangadangan do ahu amang!.

Ah, nunga muap jolma manisia ho, ndang boi be masuk tu banua ginjang on. Ipe tu BULAN an ma ingannanmu asa sian i paidaida onmu anakmi dohot borumi, ninna Bataraguru. Jadi saut ma Leangnaguratta tu bulan i maringanan, ido alana umbahen na tumatangis pinompar ni Malau molo dibondut Angkalau bulan i, songon naung binaritahon di jolo, ala naung di bulan i ompunasida.

Baliga ma nibaligahon jala barita ma nibaritahon.

Songoni ma Legenda ni Ompungta Tuan Nahodaraja ni baritahon tu hita saluhutna.




Sumber:

Buku laklak Ompu Amrin Doli Simbolon oleh R.M. Simbolon (A. Alexy) - Cinere - Jakarta Selatan